У Жабінскім раёне згарэла драўляная царква XVIII стагоддзя

25.07.2025 «Спадчына»

433

Стала вядома, што 24 ліпеня ў вёсцы Сцяпанкі Жабінкаўскага раёна згарэла Свята-Міхайлаўская царква – помнік драўлянага дойлідства XVIII стагоддзя. Пажар цалкам знішчыў будынак, які меў статус гісторыка-культурнай каштоўнасці рэспубліканскага значэння.

Царква ў Сцяпанках была збудавана ў 1780 годзе ў стылі барока. Храм меў прамавугольную кампазіцыю з купалам і званіцай, унутры вылучаліся калоны, скляпенная столь і трох'ярусны іканастас XIX стагоддзя. Асобную цікавасць прадстаўлялі вітражы і хоры над уваходам.

Свята-Міхайлаўская царква была адной з так званых «сініх цэркваў» Берасцейшчыны – групы драўляных праваслаўных храмаў XVIII–XIX стагоддзяў, якія вылучаюцца характэрным сінім колерам фасадаў і архітэктурай, што спалучае барочныя формы, класічную сіметрыю і мясцовыя традыцыі драўлянага дойлідства. Храмы ўяўляюць сабой унікальны рэгіянальны феномен народнай сакральнай архітэктуры, і менавіта гэты ансамбль прапаноўвалася ўключыць у спіс сусветнай культурнай спадчыны ЮНЕСКА.

Прычыны ўзгарання пакуль не агучаныя. На дадзены момант вядома, што будынак згарэў цалкам.

Нажаль, гэта не адзіная архітэктурная каштоўнасць, якую мы страцілі на гэтым тыдні. Раней стала вядома, што у вёсцы Дзікушкі Лідскага раёна абрынуліся калоны маляўнічай сядзібы Грабоўскіх.

Фота: «Спадчына»
Icon by kayaheart from Noun Project