Сезон адкрыты: 13 забегаў па Беларусі
Азарт спаборніцтва і пераадоленне сябе, сотні прыгожых спартыўных людзей навокал і прыўкрасны медаль на фінішы – вайб бегавога свята ні з чым не параўнаць. Якія з беларускіх забегаў варта наведаць, каб натхніцца на ЗЛЖ і добра правесці час? Тваёй увазе – больш за тузін найцікавейшых паводле аўтараў тэлеграм-канала «РобімНогі».
27 красавіка
Жук-трэйл «Гайна»
(Лагойскі раён)
Дыстанцыі: 24 км / 11 км / 6 км
Для дзяцей: 3 км / 1,5 км / 300 м
Рэгістрацыя: у дзень старта на месцы правядзення спаборніцтва
Разынка старта – ультразабег на выбыванне Backyard Ultra. У канцы гонкі застанецца толькі адзін удзельнік або ўдзельніца: той, хто здолее трымаць хуткасць 6,7 кіламетраў у гадзіну максімальна доўга. Звычайна такія спаборніцтвы цягнуцца больш за суткі. Але ў афішы старта ёсць і больш літасцівыя дыстанцыі.
25–26 траўня
Аматарскі марафон «Налібакі»
(Стаўбцоўскі раён)
Дыстанцыі: 100 км / 42 км / 21 км / 10 км
Для дзяцей: 1 км
Найстарэйшы спартыўны фестываль Беларусі (праводзіцца з 2009 года) для многіх тутэйшых велааматараў і ўльтрамарафонцаў з’яўляецца ўлюбёным стартам. Ад пачаткаў сваёй гісторыі «Налібакі» арыентаваліся на звышмарафонскія дыстанцыі, і зараз у праграме – традыцыйная «сотка» бегавога кайфу ўдалечыні ад гарадскога тлуму.
Фота: Palasatka
16 чэрвеня
«Гарадзенская вандроўка»
(Горадня)
Дыстанцыі: 10 км / 5 км
Для дзяцей: 400 м / 200 м / 100 м / 60 м
Гарадзенская брукаванка, вежы касцёлаў, Каложа – маршрут забегу складзены так, каб Горадня назаўжды засталася ў тваім сэрцы. Але гэта яшчэ не ўсё. Кожнага фінішора і фінішорку чакае бясплатная экскурсія па каралеўскім горадзе і вытанчаны медаль (такіх файных медаляў у Беларусі не робіць больш ніхто) з выявай мясцовай архітэктурнай славутасці альбо гістарычнай асобы.
22 чэрвеня
Мінскі ультрамарафон
Дыстанцыі: 100 міляў / 100 км / 50 км
Старт для загартаваных фанатаў бегу. Тут давядзецца змагацца не толькі з адлегласцю, але і з чэрвеньскай спёкай. Ад Чыжоўкі да Лебядзінага ўздоўж Свіслачы ў тры колы: стомільная дыстанцыя на Мінскім ультрамарафоне выглядае менавіта так. На ўсё пра ўсё даецца 24 гадзіны. У праграме ёсць і больш гуманныя дыстанцыі (50 і 100 км), але без грунтоўнай падрыхтоўкі на іх таксама лепей не савацца.
6–7 ліпеня
Начны трэйл Museum Run
(Мінскі раён)
Дыстанцыі: 21 км / 10 км / 5 км
Для дзяцей: 1 км
Забег ладзіцца на тэрыторыі музея архітэктуры і побыту, куды з усёй Беларусі звозілі аўтэнтычныя вясковыя пабудовы. Сялянскія сядзібы, драўляныя млыны, цэрквы з мінулага стагоддзя – лепшай лакацыі для забегу ў купальскую ноч цяжка сабе ўявіць. Але трасы будуць праходзіць не толькі паўз падсветленыя вясковыя вулачкі – бегуноў чакаюць яры і балоты ў абсалютнай цемры. Так што прыхапі з сабой ліхтарык і зменны абутак!
Фота: Palasatka
20–21 ліпеня
Адкрыты турнір сярод ветэранаў лёгкай атлетыкі
(Мінск)
Дыстанцыі: 10 км / 5 км / 1500 м / 800 м / 400 м / 200 м / 100 м
Табе ўжо споўнілася 35 і ты любіш бег? Выдатна! Ты – ветэран(-ка) лёгкай атлетыкі, і маеш поўнае права пазмагацца за ўзнагароды ветэранскага турніру. Спаборніцтва праходзіць на легкаатлетычным стадыёне – усё як у профі. У праграме – дыстанцыі ад 100 метраў да 10 кіламетраў, а таксама шмат іншых легкаатлетычных дысцыплін.
27 ліпеня
Бег па бездарожжы «Ласіная сцежка. Чорнае возера»
(Полацкі раён)
Дыстанцыі: 20 км / 10 км / 6 км / начныя 12 км / 6 км
Для дзяцей: 3,2 км / 1,6 км / 300 м / начныя 2 км / 1 км
Каб зразумець што такое беларускі трэйл (забег па бездарожжы) – варта ехаць менавіта сюды. Стромкія пад’ёмы і спускі, рачныя броды і ўчасткі балот, дзе зямля ходзіць хадуном – усё гэта і ёсць «Ласіная сцежка». Эмоцый з забега хопіць надоўга. А каб было з кім іх падзяліць, бяры з сабой малых: у праграме хапае дзіцячых дыстанцый, а таксама падчас спаборніцтва будзе працаваць садок для дашкалят і малодшых школьнікаў.
17 жніўня
Начны паўмарафон «Ласіная сцежка. Старажытны горад»
(Полацк)
Дыстанцыі: 21,1 км / 10,6 км / 5,3 км
Для дзяцей: 3,5 км / 1,8 км / 250 м
Шашэйны паўмарафон – самы папулярны фармат сярод аматараў бегу у свеце. Але ў Беларусі такіх стартаў зусім нямнога. Адзін з лепшых сярод іх – начны паўмарафон у Полацку. Велічная Сафія, паважная Дзвіна, святло поўні (так-так, астраномы абяцаюць у гэтую ноч поўню) – што яшчэ трэба, каб наталіцца гэтым камерным стартам?
8 верасня
Мінскі паўмарафон
Дыстанцыі: 21,1 км / 10,6 км / 5 км
Сямейны забег: 1,5 км
Карпаратыўная эстафета: 3х5км + 6,097км
Ёсць адзіны дзень у календары, калі цэнтр сталіцы вызваляецца ад аўто і перадаецца ва ўладу бегуноў. І гэта дзень Мінскага паўмарафона. Апошнія гады траса забегу нязменная і праходзіць у асноўным па праспектам Незалежнасці і Пераможцаў. З апошніх навінак: карпаратыўная эстафета і фініш на стадыёне «Дынама».
Фота: ave-calvar, unsplash
14–15 верасня
Kaspersky Race
(Дзяржынскі раён)
Дыстанцыі: 100 міляў / 21 км / 10 км / 5 км / начныя 10 км / цар гары
Для дзяцей: 3 км / 1 км
Двухдзённы івэнт з мноствам бегавых і роварных стартаў на любы густ. У гэтым сезоне аматараў ультры чакае навінка – 100-мільная дыстанцыя ў прыродным асяроддзі. Такога ў Беларусі раней не рабілі. Таксама ў афішцы – «цар гары» і трэйлы ад 5 да 21 км, уключна з «начной дзясяткай».
15 верасня
«Шляхам Якуба Коласа»
(Стаўбцоўскі раён)
Дыстанцыі: 30 км / 15 км / 7 км
Трэйл па коласаўскіх мясцінах Стаўбцоўшчыны. Маршрут складзены такім чынам, каб бегуны наведалі засценак Акінчыцы (дзе нарадзіўся будучы пясняр), леснічоўку Альбуць (дзе ён жыў у юнацтве), леснічоўку Смольню (дзе выкладаў у школцы). У захаваных сядзібах дзейнічаюць музеі Якуба Коласа, і яны будуць даступныя для наведвання ў дзень забегу.
28–29 верасня
«Языльская дзясятка»
(Старыя Дарогі)
Дыстанцыі: 10 км / 2,5 км
Для дзяцей: 2,5 км / 500 м
Ходзяць чуткі, што раней на гэтым забегу можна было выйграць парсючка ці мех зерня. Але і зараз прызавыя тут застаюцца прывабнымі, а траса хуткай: таму гэты старт любяць не толькі бывалыя аматары, але і профі.
Фота: tara-glaser, unsplash
5 кастрычніка
Маларыцкі марафон
Дыстанцыі: 42,2 км / 10 км
Для дзяцей: 2 км / 1 км / 500 м / 300 м
Адзін з найстарэйшых аматарскіх забегаў Беларусі праходзіць у Маларыце: ён вядзе сваю гісторыю з 1983-га года. І шмат у чым ён захаваў аўру і сардэчнасць таго часу. Удзельнікі могуць бясплатна заночыць у мясцовым інтэрнаце, сняданак і абед – таксама за кошт арганізатараў.
Фота: Palasatka
