Горадня

|

Гайды

|

Аўтар:   34travel

|

  1482

Культурная сталіца Беларусі, сталіца беларускага каталіцызму, другая сталіца Беларускай Народнай Рэспублікі і трэцяя сталіца Рэчы Паспалітай, Горадня – гэта зусім іншая Беларусь. Тут натхняўся Уладзімір Караткевіч, а элітным да гэтага часу лічыцца раён, дзе жыў Васіль Быкаў. Культурная праграма, найлепшыя ўстановы і свая атмасфера – абнавілі гайд па каралеўскім горадзе Беларусі.

 

ЗМЕСТ ГАЙДА:

ТРАНСПАРТ   ЖЫТЛО   КУЛЬТУРНАЯ ПРАГРАМА   кава

ЕЖа   БАРЫ   ШОПiНГ  info

 

 

Як дабрацца

Небяспечную трасу М6 нарэшце адрамантавалі, і цяпер у Горадню можна імчаць камфортнай новенькай дарогай. У Горадню з Менска штогадзіну з 4:20 да 22:00 ходзяць маршруткі. Час у дарозе – 3,5 гадзіны. Аўтобусы менскага «Аўтобуснага парка № 2» ездзяць радзей, едуць даўжэй (4 гадзіны), але каштуюць танней.

Альтэрнатыўны варыянт – цягнік. Час у дарозе – ад 4 да 7,5 гадзін. Самы хуткі цягнік стартуе з Менска ў 15.15, а ў 19.10 ты ўжо ў Горадні. Цэны на квіткі розныя: ад € 2 да € 7. Удакладняй інфармацыю па цягніках на сайце БЧ.

Транспарт у горадзе

У транспарце няма кандуктараў, квіткі купляй на прыпынку ці ў кіроўцы і абавязкова адразу кампастуй. Дарэчы, цяпер практычна ва ўсіх аўтобусах і тралейбусах Горадні можна расплаціцца па QR-кодзе ў гэтым дадатку.

Хочаш даследаваць Горадню на ровары? Шукай пункты велапракату «ВелоСтарт» (вул. Савецкая, 9). Яго зручнасць у тым, што ровар можна ўзяць у адным месцы і пакінуць у іншым. Ёсць магчымасць анлайн-браніравання. Яшчэ адзін пракат таксама месціцца ў цэнтры – «ЕвроПрокат» (вул. Сацыялістычная, 51А).

Таксама ў Горадні працуе шэрынг ровараў і самакатаў ад Колоbike і шэрынг электрасамакатаў Eleven.

 

 

 

Гасцініц у Горадні не вельмі шмат, таму амаль усе спыняюцца на здымных кватэрах – гэты бізнэс тут развіты добра, аб'явы лёгка можна знайсці ў інтэрнэце.

Нешта цікавае ёсць і на Airbnb, хаця ў Горадні гэта яўна не самы папулярны сэрвіс. Зняць кватэру на суткі можна за € 30-45 у цэнтры або € 15-30 крыху далей ад цэнтра. Горад невялікі – усюды блізка. Адзінае, бадай што, у Альшанцы не спыняйся – раён непрыстойна далёка і камунікацыя з ім самая слабая. Самы вялікі выбар апартаментаў у Горадні знойдзеш на euapartments.by. Цэны пачынаюцца ад € 25 за ноч.

Хостэл у Горадні да нядаўняга часу быў усяго адзін і зусім маленечкі – Hello Grodno (вул. Гараднічанская, 30) – у самым цэнтры. Ложак каштуе € 7-8.

Звярні ўвагу і на «Кронон Парк Отель» (урочышча Пышкі, 19) – невялікі дызайн-гатэль у класічным стылі ў цэнтры лесапарку «Пышкі». У гатэлі ёсць летняя галерэя і крыты басейн, а ў 10 хвілінах язды размешчаны стары замак XVII стагоддзя. Кошт стандартнага нумара на дваіх стартуе ад € 60, але выгода і першакласны сэрвіс таго вартыя. Нават калі ты не збіраешся спыняцца ў «Кронане», раім заехаць сюды хаця б на вячэру, каб атрымаць асалоду ад беларускай і еўрапейскай кухні на адкрытай тэрасе рэстарана.

Яшчэ адзін нядрэнны хостэл – Old Bridge (вул. Разанава, 34). Яго назву лёгка растлумачыць – непадалёк знаходзіцца так званы Стары мост праз Нёман. За ложак аддасі € 5-8.

Таксама раім звярнуць увагу на хостэлы Hostel GOSteam (вул. Маставая, 31) і Hostel Sarmatia (вул. Карла Маркса, 11).

Своеасаблівы хостэл, рэкламы якога ты нідзе не знойдзеш, ёсць на чыгуначным вакзале (вул. Будзёнага, 37), і называецца ён проста «пакой адпачынку». Двухмесны двухпакаёвы нумар падвышанай камфортнасці каштуе тут усяго € 12 за суткі! А пераначаваць аднаму ў чатырохмесным нумары выльецца і зусім у € 7. Дарэчы, тут ёсць пакой для людзей з інваліднасцю.

Калі ўсё ж такі ёсць грошы і жаданне пасяліцца ў гасцініцы, то варыянт прыстойнейшы, але даражэйшы – «Славія» (вул. Маладзёжная, 1) або «Сямашка» (вул. Антонава, 10). Кошты ад € 40-45 за чалавека. Танней, але цярпіма – «Омега» (вул. Васілька, 40). Дзе яшчэ знойдзеш аднамесны двухпакаёвы люкс за € 16? Выходзячы з «Амегі», дарэчы, літаральна адразу трапляеш у галоўны гарадскі парк імя Жылібера – размяшчэнне вельмі ўдалае.

 

 

 

Гарадзенцы ўпэўненыя, што іх горад – культурная сталіца Беларусі. І з гэтым цяжка спрачацца. Абавязкова прайдзіся пешаходнай Савецкай вуліцай, выбрукаванай на славу, што ў ідэальным стане захавалася з 1938 года. Вуліца была пешаходнай яшчэ тады, калі ў Менску вуліцы для аўто не закрывалі нават «па раскладзе».

Тут абавязкова варта зазірнуць у галерэю «Крыга» (вул. Савецкая, 3, у двары), сёння вядомую таксама як «Цэнтр гарадскога жыцця». Выстаўляцца ў ёй – ганарова нават для такіх мэтраў сучаснага беларускага мастацтва, як Уладзімір Цэслер. Акрамя таго, тут часта адбываюцца самыя розныя інтэлектуальныя мерапрыемствы, не абавязкова звязаныя з мастацтвам.

Музей гарадскога побыту (вул. Лермантава, 25) знойдзеш на шляху ў Каложскі парк – адкрыў яго каларытны сталы стыляга, патомны гарадзенец і заўзяты калекцыянер Януш Паруліс. У даваенным дамку ён сабраў фота, посуд, меню рэстаранаў 50-гадовай даўніны, музычныя інструменты, фотаапараты, кнігі, шыльды, кафлю са старажытных печаў, бутэлькі ад гродзенскага піва 30-х гадоў – складана сказаць, чаго тут няма. Пан Януш – неймаверны апавядальнік, так што сумна тут не будзе.

З дзяржмузеяў параім Музей гісторыі рэлігіі (вул. Замкавая, 16) – адзіны ў краіне і з вельмі багатай калекцыяй.

Летась увосень доўгачаканае адкрыццё Старога замка ў Горадні пасля рэканструкцыі, якая вялася з 2017 года, нарэшце адбылося. Пакуль завяршыўся толькі адзін з першых этапаў аднаўлення славутасці: тут адбудавалі ўязную і сярэднюю вежы, а таксама аднавілі крапасную сцяну з галерэяй. Унутры вежаў размясціўся музей, у залах якога можна даведацца як пра гісторыю Горадні, так і пра мінулае самога замка. Вось тут мы пісалі пра замак падрабязней.

Самы прыемны бонус ад наведвання Старога замка – шыкоўная назіральная пляцоўка, адкуль адкрываецца чароўны від на горад: тут можна ўбачыць і сам Стары замак над ракой, і Новы замак насупраць, і амаль усе касцёлы і цэрквы Горадні, і Каложу – гэта адна з найлепшых панарам, якую ўвогуле можна адшукаць у Беларусі.

Яшчэ пару незвычайных музеяў знойдзеш у гэтай падборцы.

Горадню называюць сталіцай беларускага каталіцызму, таму нельга прайсці міма кафедральнага сабора Францішка Ксаверыя (пл. Савецкая, 4). 21-метровы разны алтар, адзін з самых старых у Еўропе вежавы гадзіннік, магутны арган – пра гэта расказваюць кожнаму турысту. Але мала хто ведае, што ў касцёле ёсць няўзрочны абраз японскіх святых, на якім намаляваны малады Аляксандр Мілінкевіч! Так-так, той, які быў кандыдатам у прэзідэнты ў 2006-м. Мясцовыя расказваюць, што ў канцы 80-х – пачатку 90-х падчас рэстаўрацыі гадзіннікаў на вежы знайшлі паўразбураны абраз трох японскіх езуітаў-пакутнікаў XVII стагоддзя. Выява аднаго з іх практычна не мела аблічча, таму знакаміты рэстаўратар Уладзімір Кіслы намаляваў там твар свайго добрага сябра.

І ўвогуле варта зрабіць асобны тур па рэлігійных пунктах. Упэўненыя, што ўнікальную Каложскую царкву XII стагоддзя ты знойдзеш і без нашых падказак. Таксама варта наведаць Лютэранскую кірху (вул. Акадэмічная, 7а): па-першае, неаготыка – гэта прыгожа, па-другое, аргану, прывезенаму з Германіі, пазайздросцяць многія канцэртныя залы. Рэлігійны тур будзе няпоўны без Вялікай харальнай сінагогі (вул. Вялікая Траецкая, 59а). Паўразбураны будынак цяпер адрэстаўраваны стараннямі мясцовых бізнэсмэнаў, а малельная зала ўнутры дзівіць маштабамі і багатай ляпнінай. Старшыня абшчыны Барыс Максавіч, калі толькі ты яго сустрэнеш, можа расказаць шмат цікавага пра гісторыю гарадзенскіх габрэяў ды іх звычаі. А ў невялікім музеі ты даведаешся, што гарадзенскія габрэі стварылі эсперанта, інтэрнэт, Лас-Вегас і амерыканскую мафію.

Застаючыся ў тэме вечнага, параім схадзіць на старажытныя могілкі па вуліцы Антонава. Гэта самыя старыя ў Беларусі камунальныя клады (XVIII стагоддзе) і адны з трох найважнейшых у былой Рэчы Паспалітай. Дзякуючы шыкоўным помнікам гэтае месца як сапраўдны музей. Ды і пахаваныя тут многія заслужаныя людзі. Самая вядомая магіла – знакамітай пісьменніцы Элізы Ажэшкі, якую ў гонцы па Нобель двойчы абыходзілі калегі па цэху – Генрых Сянкевіч і Сельма Лагерлёф. Калі захочаш паўнавартасную экскурсію – памятай, што яе ў горадзе прапануюць лічаныя экскурсаводы.

Калі ты яшчэ недастаткова прасякнуўся(-лася) гістарычнай атмасферай, проста пасядзі на Замкавай гары або на ўзгорку Новага замка. Від на даліну Нёмана тут сапраўды прабірае да глыбіні душы. Яшчэ можна вырашыць квэст – забрацца на гару пасля закрыцця замкавай брамы, па мысе з боку Каложы. Там да цябе праклалі сцежкі, каб ты не скаціўся ўніз, як гэта бывала з крыжакамі ў XIV стагоддзі. Забраўшыся наверх, патрапіш на руіны замка Вітаўта.

Спяшайся ўбачыць унікальны раён драўляных віл пачатку XX стагоддзя Новае святло. Праўда, ужо цяпер ад яго няшмат засталося, але можа быць горш. Драўлянага польскага канструктывізму ты больш нідзе не знойдзеш. Сёння раён у запусценні, а некалі тут жыла гарадская эліта: дактары, інжынеры, выкладчыкі.

Абавязкова трэба спыніцца на вуліцы Замкавай: сёння гэта забітая машынамі вулачка, але ў яе ёсць усе шанцы стаць другой пешаходнай. А яшчэ на Замкавай ёсць свая Мона Ліза – прыгледзься да фасада пажарнай часткі.

На самым высокім месцы старога горада стаяць гарадзенскія воданапорныя вежы-двайняты Кася і Бася. Чаму іх так назвалі – невядома. Але ўбачыць іх дакладна варта. А калі ёсць кантакты ў мастацкім свеце, то абавязкова варта паспрабаваць патрапіць унутр – сёння там майстэрні гарадзенскіх мастакоў.

У межах горада ёсць некалькі фартоў Першай сусветнай, яшчэ больш – вакол горада, у роварнай даступнасці. Да некаторых фартоў вядуць абазначаныя веламаршруты. Большасць фартоў Гарадзенскай крэпасці былі ўзарваныя, але ў некаторыя можна нават зайсці ўнутр. Без ліхтарыка не лезь – можна праваліцца ў глыбокую яміну!

У Горадні два тэатры – драматычны і тэатр лялек, – але складана сказаць, які з іх больш варты ўвагі. У «Ляльках» (вул. Дзяржынскага, 1/1) даюць Шэкспіра, Купалу, рускую класіку, гісторыі, навеяныя часамі Рэчы Паспалітай, і нават «Фаўста» Гётэ – усё ў вельмі арыгінальных пастаноўках. Самы складаны квэст – трапіць на культавых «Тутэйшых» з Віктарам Шалкевічам, якіх паказваюць раз на год, а то і радзей. Дарэчы, будынак тэатра ўзведзены яшчэ ў XVIII стагоддзі!

Будынак драмтэатра (вул. Маставая, 35) рэгулярна трапляе ў топы самых незвычайных пабудоў савецкай эпохі, таму яго варта ўжо хаця б убачыць. У афішы шукай спектаклі «451 па Фарэнгейце», «Выпадковая смерць анархіста», «Аскар і Пані Роза» – гэта выдатныя пастаноўкі, якія прымушаюць задумацца.

Хочаш пазнаёміцца з тымі, хто робіць у Горадні культуру? Зайдзі ў творчую прастору ДОМ46 (вул. Лелявеля, 46). Там заўжды нешта дзеецца.

Выдатны від на цэнтр Горадні адкрываецца з «Даху свету» (вул. Савецкая, 18). Абавязкова падыміся сюды падчас шпацыру па пешаходнай вуліцы.

 

 

 

«Наша Кава» (вул. Замкавая, 11) – меню на беларускай, уласнік з прозвішчам прэзідэнта БНР і «кава па-паўстанцку» – не адзіныя фішкі гэтай маленькай кавярні. Тут за барам працуюць самі гаспадары, а акрамя стандартнай камерцыйнай сумесі могуць прыгатаваць specialty-каву якім-небудзь незвычайным метадам.

Яшчэ адна маленечкая кавярня з выдатнай кавай і аскетычным інтэр'ерам – «Просто Кофе» (вул. Замкавая, 18). З акна – шыкоўны від на Стары замак і пажарную каланчу. А яшчэ тут самая мінімалістычная летняя пляцоўка ў горадзе – проста лаўка з падстаўкамі пад каву. Шкада толькі, што побач даволі шумная вуліца.

Кавярня «Джэзва» (вул. Савецкая, 5) – адзінае месца ў горадзе, дзе вараць каву на пяску. У кавярні можна падсілкавацца: увесь дзень тут даюць сняданкі і гатуюць бейглы. Бонусам – летні дворык, дзе па выходных можна слухаць музыку да паўночы.

«Проходная» (вул. Маставая, 31) – прыемнае месца ў самым цэнтры Горадні, каля Савецкай плошчы. Акрамя кавы ёсць і ежа: напрыклад, хатнія тарты і карысныя сняданкі.

Галоўная фішка кавярняў «Kакао» (вул. Будзёнага, 28, вул. Савецкая, 6), як ні дзіўна, какава. У продажы ў рабят ты знойдзеш пакуначкі з самаробным шакаладам (выдатны падарунак для сяброў), карамельную пасту і дэсерты, а ў меню – розныя віды какавы, гарачага шакаладу, гарбаты і кавы.

Leone House (вул. Савецкая, 7) – бадай, адна з самых стылёвых устаноў проста ў цэнтры Горадні. Унутры – крэслы з намаляванымі дзівоснымі птушкамі, карціны ў стылі Адраджэння і вялізныя вочы Давіда на ўваходзе, у меню – сэндвічы з чыабаты, круасаны і, вядома ж, кава.

Адна з новенькіх кавярань у Горадні называецца «Тепло» (вул. Вялікая Траецкая, 37). Унутраны інтэр'ер цалкам гарманіруе з назвай: мяккае прыцішанае святло, плеценая мэбля, багацце раслін вакол – утульнасць ды і толькі. Гатуюць рабяты на зерні ад знаёмых менчукам Kitchen Coffee Roasters, цэны – ад 3 да 7 рублёў.

Wake Up Coffee – гэта перасоўны фургончык з кавай і ліманадам. Улетку ўладальнікі кафэ рассцілаюць пледы на газон і ставяць побач драўляныя падносы, узімку ў меню з'яўляецца духмяны глінтвейн. Калі бярэш каву ў свой кубак – атрымліваеш невялікую зніжку і хатняе печыва ў падарунак.

 У цэнтры горада ўтульна размясцілася кавярня «Чашки&ложки» (вул. Вялікая Траецкая, 9). Ва ўстанове знойдзеш свежыя дэсерты, бескафеінавую каву і каву з свежаабсмажанага зерня, а таксама безалкагольны глінтвейн. Сама кавярня зусім невялікая памерам – усяго на пару столікаў.

 




 

Перакуска

Burger King (вул. Савецкая, 25) – Горадня стала першым пасля Менска горадам, куды прыйшоў амерыканскі фастфуд. Калі шануеш прадказальнасць, стандарты сусветных брэндаў і стабільнасць – табе дакладна сюды. Дарэчы, McDonald's (вул. Гарнавых, 9) у Горадні таксама ё.

У вулічнай будцы на ўваходзе ў парк Жылібера – кавярня «ПарКінг» (вул. Ажэшкі) – можна пакаштаваць нядрэнныя бургеры. Кіёск працуе круглы год (узімку наліваюць глінтвейн!), тут ёсць Wi-Fi. Веганскія бургеры і ролы таксама гатуюць.

«Баторыя» (вул. Баторыя, 10) – кафэ ў папулярнай краме ў цэнтры. Цікавае спалучэнне псеўдагістарычнага інтэр'еру і абсалютна савецкага сэрвісу. Піражкі і беляшы з гадамі застаюцца такімі ж смачнымі. І цэны капеечныя!

«Шаурма #1» (вул. Ажэшкі, 47) вельмі зручна размешчаная – усяго ў пары хвілін хады ад чыгуначнага вакзала. Ты можаш зрабіць замову навынас ці паабедаць унутры. У меню ёсць вегетарыянскія пазіцыі.

Проста на самай турыстычнай пешаходнай вуліцы Горадні знаходзіцца Shaw-books (вул. Савецкая, 7) – прасторная ўстанова з рознымі варыяцыямі шаўрмы ў асноўным меню. Усяго ўстанова мае 5 кропак па горадзе, так што шаўрму ты зможаш пакаштаваць, знаходзячыся не толькі ў цэнтры.

«Ніндзя Кебаб» (вул. Белуша, 4) – яшчэ адно месца, дзе можна перакусіць на хуткую руку. У меню класічны набор з піты, шаўрмы (цэны стартуюць ад € 2) і напояў.

«Анталья Донер» (вул. Вялікая Траецкая, 29) – як можна здагадацца па назве, у меню ты знойдзеш турэцкі фаст-фуд: гёзлеме з сырам, турэцкі гамбургер, турэцкі донер востры і яшчэ шмат пазіцый са словам «турэцкі» ў назве.

Калі стомішся ад шопінгу ў гандлёвым цэнтры «Трыніці», то май на ўвазе, што на трэцім паверсе ёсць фудкорт з установамі на любы густ.

 

Кафэ / Рэстараны

Па суседстве з кавярняй «Тепло» ёсць месцейка пад назвай Punk Roll (вул. Вялікая Траецкая, 37). У асноўным меню суседнічаюць ролы з назвамі The Offspring, Міхалок, Billy Talent - здаецца, вайб установы ты ўжо зразумеў(-ла). Перыядычна ва ўнутраным дворыку праходзяць жывыя канцэрты, правярай афішу.

Рэстаран «Хотей» (вул. Элізы Ажэшкі, 1) нядаўна цалкам змяніўся як у плане інтэр'еру, так і ў меню: цяпер тут, акрамя вялікага выбару ролаў і піцы, з'явіўся націск на азіяцкую кухню. Кошты вышэйшыя за сярэднія па горадзе: напрыклад, за супчык фо-бо з ялавічынай давядзецца аддаць 23 BYN, за любы поке – 18 BYN.

«Раскоша» (вул. Савецкая, 7) – крыху пафаснае месца, адно з нешматлікіх, дзе ёсць вельмі атмасфернае сутарэнне. Найменне гістарычнае – так называлася гарадзенская карчма канца XVIII стагоддзя, праўда, знаходзілася яна зусім на іншай вуліцы. Выдатныя крэм-супы і супы-пюрэ за € 2-4. Дэсерты, якімі «Раскоша» славіцца, – € 2-5. Кава – € 1,2-7.

Папулярнае сярод першакурснікаў бістро з арыгінальным (па мерках Гродна) інтэр'ерам – «Большой буфет» (вул. Савецкая, 18). Выбар страў не такі ўжо і вялікі, затое гэта самае высокае грамадскае харчаванне ў горадзе: чацвёрты паверх універмага – гэта як шосты ў звычайным доме. Кітайская локшына (смаката!) – € 2,4. А яшчэ тут падаюць «беларусіяна» – той жа амерыкана, толькі даліваюць у два разы больш воды.

«Дранікі» (вул. Элізы Ажэшкі, 35а) – так называецца ўтульная кавярня ў старадаўнім будынку пачатку XX стагоддзя (звярні ўвагу на карціны на сценах – аўтэнтычная вышыўка крыжыкам). Пра галоўную страву кавярні ты ўжо, напэўна, здагадваешся з назвы, але ведай – у меню ёсць таксама пельмені, бельгійскія вафлі і марозіва. Кошты на дранікі дэмакратычныя і стартуюць ад €1,5.

Калі любіш грузінскую кухню – табе ў «Хінкальню» (вул. Урыцкая, 5). У меню любімыя ўсімі хінкалі, супы, хачапуры, гарачыя стравы і хатнія віны. Калі плануеш прыйсці сюды ў пятніцу ці ўвечары ў выходныя разам з сябрамі ў вялікай кампаніі – раім забраніраваць столік загадзя.

Па смачны і недарагі абед заходзь у карчму «Падкова» (вул. Кірава, 9). Меню арыентаванае на стараславянскую і старабеларускую кухню, у ланч-меню знойдзеш халаднік, пюрэшку і бульбяныя зразы – усё, як мы любім!

Гастра-бар Werden (вул. Маставая, 31) адкрылі трое сяброў-піцерцаў, якіх аб'яднала наяўнасць гарадзенскіх бабуль. Стылёвае, цікавае меню, крафтавае піва і вельмі ветлівыя афіцыянты. Але кошты вышэйшыя за сярэднія па горадзе.

Проста каля Werden знаходзіцца вінны бар «Справа» (вул. Маставая, 31). Месца папулярнае ў моладзі, і зразумела чаму: стылёвы інтэр'ер, смачная кава (ёсць невялікі выбар прэміум-кавы для пакупкі з сабой), сняданкі да 16:00 і віно на любы густ. Кошты сярэднія.

Калі любіш індыйскую ежу, заходзь у індыйскі рэстаран Ganga (вул. Калючынская 12). У меню – звыклыя пазіцыі для аматараў такога роду кухні, шмат vega-пазіцый. Афіцыянт пацікавіцца, наколькі вострай ежы ты аддаеш перавагу, – каб пазбегнуць сюрпрызаў.

Аматарам піцы рэкамендуем «Форна» (вул. 1-я Працоўная, 10) – піцэрыю, якая знаходзіцца ў самым цэнтры горада. Гатуюць на дровах у італьянскай печы, а ў меню ўстановы цэлых 46 відаў піцы.

Знакаміты гродзенскі піцатрак на Вялікай Траецкай, 9 ператварыўся ў паўнавартасную піцэрыю з даволі вялікай колькасцю пасадачных месцаў. Але ў выходныя ўсё ж такі не палянуйся і забраніруй столік загадзя, тым больш калі плануеш пакаштаваць сапраўдную неапалітанскую піцу на дровах у атачэнні вялікай кампаніі.

Рэстаран «Беласток» (вул. Віленская, 2) – гэта сапраўдная перліна аўтэнтычнай беларускай кухні ў Горадні. У меню стравы беларускай кухні і цікавыя барныя рашэнні: абляпіхавы квас, хранавуха, размаітыя настойкі.

Найлепшыя стэйкі падаюць у грыль-бары «Хані Кабані» (БЛК, 50). Рай для мясаедаў, плюс цікавы эклектычны інтэр'ер. Для гурманаў ёсць мармуровае мяса. Мінус – далёка ад цэнтра, трэба сюды ехаць спецыяльна.

Трохі наводшыбе, але ўсё яшчэ ў гістарычным цэнтры, знаходзіцца «Веранда» (вул. Падольная, 37). Месца на беразе Нёмана выдатнае, але від адсюль спецыфічны – на чыгуначны мост, які строга ахоўваецца і па якім у абед праязджае цягнік «Кракаў–Гродна». Як ні дзіўна, гэта, верагодна, адзін з самых старых будынкаў у Горадні – тут некалі, яшчэ ў XVII стагоддзі, знаходзіўся магнацкі палац. А гадоў 100 назад гэта быў самы бандыцкі раён горада.

Рэстаран з відам на Стары замак назвалі ў гонар знакамітага тэатральнага мастака родам з Гродна – «Бакст» (вул. Замкавая, 21). Сцены ўпрыгожаныя малюнкамі Льва Бакста, а яшчэ сюды завабліваюць модным тэрмінам «малекулярная кухня». Меню выдатнае, але кошты відавочна вышэйшыя за сярэднія ў горадзе.

 

 

 

«‎Урбанист» (да рэбрэндынгу – «Третье место») (вул. Маставая, 31) – гэта бар з галерэяй новага фармату, які размясціўся ў сутарэннях былой пальчаткавы фабрыкі. Установа дзеліцца на некалькі зон: бар, аддзел з кнігамі і галерэю, дзе мастакі і фатографы прадстаўляюць свае працы.

Незвычайны інтэр'ер і велізарная кактэйльная карта – гэта пра гастра-бар «Гудини» (вул. Леніна, 13). Аматары здаровага ладу жыцця таксама знойдуць напой сабе да душы – ёсць нават кактэйлі на аснове натуральнага мёду.

Класічнае комба «піва+ракі» знойдзеш у бары «Beerлога» (вул. Саломавай, 137). Раім велізарную і вельмі смачную свіную рульку. Часам тут можна патрапіць на бяседы Гарадзенскай піўной лігі – на іх часта можна пакаштаваць якія-небудзь рэдкія гатункі піва.

Яшчэ адно папулярнае месца ў самым цэнтры горада – рэстаран-паб у англійскім стылі «Гринвич» (вул. Савецкая, 29), працуе з 5 гадзін вечара ў буднія дні. Рэкамендуем падстрахавацца і зрабіць бронь загадзя. У меню паба стэйкі, рыба, рэбры – і ўсё гэта прыгатаванае на вуглях. У якасці бонусу – жывая музыка, а таксама вялікая вінная і піўная карты.

«Сон Бар» (вул. Тэльмана, 4), вядомы раней як «Кроватка», – адзіны пакінуты ў горадзе веган-бар пасля закрыцця знакамітай «Несцеркі». Унутраны дызайн шырокі: тут і лавачкі ў выглядзе ложкаў, і вялікія люстры, а на сценах – старадаўнія карціны. У бары ёсць тры зоны: танцавальная, дзе часцяком гучыць электронная музыка, і некалькі месцаў для адпачынку – адно з іх размешчанае ва ўтульным дворыку.

У невялікі бар «Погружение» (вул. Савецкая, 18) можна забегчы не толькі каб пакаштаваць напоі на месцы, а каб забраць нешта з сабой: у продажы шмат пазіцый крафтавага замежнага піва і медавухі.

Рэстаран-бровар «Гости» (вул. Замкавая, 3) – гэта двухпавярховы рэстаран з уласным броварам. Выбар пазіцый і закусак – велізарны, месца карыстаецца вялікай папулярнасцю ў мясцовых і гасцей, так што калі плануеш забегчы на выходных, то браніруй столік загадзя.

Pablo Restobar (вул. Савецкая, 13) – месца, дзе ўвесь час гучыць жывая музыка, а наведнікі фатаграфуюць прыгажэнныя кактэйлі. Сама ўстанова – двухпавярховая, вельмі ўтульная, у меню, акрамя розных закусак і асноўных страў, знойдзеш пазіцыі пампейскай печы – напрыклад, хачапуры па-аджарску.

«Фарадей» (вул. Сацыялістычная, 32) – месца, дзе змяшаліся кактэйлі, бургеры і дызайн у стылі стымпанк. А яшчэ ў бары ўвесь час праходзяць вечарынкі і DJ-сэты.

Los Amigos (вул. Урыцкага, 26) – каларытны рэстаранны дворык, схаваны ў вузкіх вулачках Горадні. Тэматыка ўстановы – Мексіка, таму меню адпаведнае: бурыта, кесадылья, така, ну і, вядома ж, тэкіла.

На месцы культавага ў сярэдзіне 2000-х бара «Куфэрак» сёння працуе «Бухта» (больш вядомы жыхарам горада назвай «Корица») (вул. Віленская, 6).

Клуб «База» (вул. Перамогі, 35) – адзін з найлепшых у горадзе. Тут праходзяць канцэрты, турніры бармэнаў ды іншыя буйныя падзеі. Побач – яго «браты і сёстры»: найстарэйшы гарадзенскі боўлінг-клуб «Метро», рэстаран «Баста Паста» з сапраўдным італьянскім шэфам, караоке-бар «ФанЭра» і afterparty-бар Coolbar. Калі ў планах у цябе абавязковае наведванне клуба, дык тады і думаць не трэба, куды ісці.

У дыска-бары «Африка» (вул. Урублеўскага, 1а) знойдзеш поўны стандартны набор гарадзенскіх клубаў: рэтра-, тэхна- і рускія вечарынкі, кальяны, бармэн-шоу, а часам – BDSM-style закрытыя тусоўкі.

«Государственный ночной клуб» – гучыць смешна, але ў Горадні гэта працуе. Клуб «Movie 60» (вул. Савецкая, 9) знаходзіцца ў Маладзёжным цэнтры «Гродно» – былым кінатэатры (прыгледзеўшыся да архітэктуры залы, ты гэта заўважыш). Не бойся, надпісаў "БРСМ" на ўсю сцяну няма, затое ёсць талковы арт-дырэктар і рэальна папулярныя ў горадзе вечарынкі. А яшчэ міні-гольф.

 

 


 

ГД «Нёман» (вул. Савецкая, 18) – былы савецкі ўнівермаг, які сёння – проста набор самых розных крамаў пад адным дахам. Паглядзі на вітражы на лесвічных пляцоўках – іх рабіў знакаміты манументаліст Сяргей Грыневіч. На даху ёсць аглядная пляцоўка з выдатным відам на стары горад. Сярод фірменных секцый прыгледзься да скураных сувеніраў ад знакамітай студыі «Макей» – у Горадні яны павінны быць таннейшыя.

Гандлёвы цэнтр OldCity (вул. Дубко, 17) аказаўся вельмі папулярным сярод літоўскіх бязвізавых турыстаў катэгорыі «за 50». Ты ж звярні ўвагу на старажытную цэглу на сценах (тоны яе везлі спецыяльна з Польшчы!) і першы ў краіне беларускамоўны «Еўраопт».

Этна-крама «Цудоўня» (вул. Кірава, 3) – тут знойдзеш самы вялікі выбар традыцыйных сувеніраў ручной работы, а яшчэ кнігі, магніцікі ды іншыя радасці турыста. Ну ці проста вып'еш таннай, але смачнай кавы, падключышся да Wi-Fi і пагаворыш пра жыццё з уласнікамі. Па вечарах – лекцыі, прэзентацыі, кіно і дыскусіі. Пад адным дахам таксама працуюць крама мэблі з масіву «33 камоды» і крама настолак «Кубік» (яны распрацоўваюць уласныя арыгінальныя гульні – абавязкова спытай пра іх!).

Канкурэнт па продажы рукадзелля – «Лёля» (вул. Савецкая, 1-3). Як і ў «Цудоўні», уласнікі – маладая сям'я класных актыўных беларусаў. Культурная праграма пакуль не такая багатая, але гэта справа часу.

«Ткалля» (вул. Замкавая, 15) – рамесная крама-майстэрня, дзе гаспадыня пры табе можа стравыць сапраўдную вышыванку. Аўтэнтыка 100% – нават проста зазірнуць сюды цікава.

Triniti (прасп. Янкі Купалы, 87) – адзін з самых буйных гандлёвых цэнтраў у краіне. Праз пандэмію ён не паспеў пакуль запоўніцца крамамі дарэшты, аднак выбар іх усё роўна немаленькі. Калі захочаш падсілкавацца – у гандлёвым цэнтры ёсць вялікі фуд-корт.

 

 

Славутасцi гораднi на мапе
 


 


ap1.by – тут знойдзеш анлайн-расклад аўтобусаў з сачэннем па GPS

grodnotu.by – расклад тралейбусаў (нязручны – у xls і pdf)

hrodna.life – штодзённыя навіны Горадні

s13.ru – агрэгатар гродзенскіх навін з жорсткімі каментатарамі

grodno.in – каталог з водгукамі

vk.com/typical_grodno – папулярны гарадскі паблік


Абнаўленні 2022 – Оля Шаўцова. Фота: palasatka

 

|

Гайды

Аўтар:   34travel

  1482

hand with heart

Поддержи редакцию 34travel на Patreon!

Уже больше года мы делаем журнал о путешествиях в мире, где путешествия стали настоящим квестом. Мы очень рады, что ты остаешься с нами и продолжаешь читать материалы 34travel. Будем благодарны за support в эти сложные времена.

Подписаться на Patreon

Чытай таксама

Пiнск

Душэўны гайд па сталіцы Палесся, якая падарыла свету першага прэзідэнта Ізраіля і іншых знакамітасцей.

Цяпер на галоўнай

Пiнск

Душэўны гайд па сталіцы Палесся, якая падарыла свету першага прэзідэнта Ізраіля і іншых знакамітасцей.

Куды пайсці ў Менску ў чэрвені? Афіша івэнтаў

Шэкспір, Батсад і беларускі фальклор.

У Go to Belarus з’явілася беларускамоўная версія

Нарэшце!

10 абарончых храмаў Беларусі

Культавыя пабудовы, якія за сваё жыццё ўжо шмат чаго пабачылі.

5 кніг для вандровак па Палессі

Навуковыя выданні пра архітэктуру і альбом старажытных здымкаў.

Народная культура: Музеі пад адкрытым небам непадалёк ад Менска

Крохкая спадчына драўлянай архітэктуры.

Гісторыя мастацтва Беларусі. Усе падкасты 34travel

Беларуская арт-сцэна ад старажытных часоў да сучаснасці.

Як гучыць твая краіна? Усе падкасты 34travel пра гарады Беларусі

Аўдыякніга ўдумлівага падарожніка па Сінявокай.

34 славутасці Беларусі

Вартыя нагоды аб'ездзіць краіну ўздоўж і ўпоперак.

Паказаць больш Паказаць больш