Месца тыдня: Менскае гарадзішча
Мінскае гарадзішча – археалагічны комплекс IX–XI стагоддзяў каля вёскі Гарадзішча. Паводле адной з гіпотэз, менавіта яно і было калісьці старажытным Менскам, а ўжо пасля таго, як яго некалькі разоў спалілі, селішча перанеслі на цяперашняе месца – каля рэк Свіслач і Няміга. Гэта адзін з найважлівейшых археалагічных помнікаў Беларусі.
Гарадзішча знаходзіцца за дзесяць кіламетраў ад сучаснага Менска. Цяпер гэта спакойнае і ціхае месца: тут зберагліся высокія земляныя валы, цячэ рака Менка ды яе прыток – ручай Дунай. Але ўяві, што гэтым валам тысяча гадоў, – і яны ўразяць цябе мацней, чым Вялікая кітайская сцяна. На пустым месцы ў цэнтры быў сапраўдны горад, аточаны сценамі да дзесяці метраў вышынёю, дзе жылі князі, рамеснікі і купцы. Археолагі знаходзілі тут рэшткі посуду, зброю, упрыгожанні, артэфакты са Скандынавіі, Візантыі і Егіпта і нават скарбы. Самыя раннія знаходкі датуюць V стагоддзем да нашай эры. Вакол гарадзішча было сканцэнтравана шмат селішчаў – усяго яны займалі каля 30 гектараў, а шчыльнасць насельніцтва тут была адной з самой высокіх у Полацкім княстве. Так што можна лічыць, што гэта быў мегаполіс дзясятага стагоддзя
Прыязджай сюды, каб перазагрузіцца, пабыць сам-насам з прыродай і набрацца сілаў. Прайдзіся па валах, папі вады з крыніцы, абдымі дрэвы – і адчуй, што старажытная гісторыя на тваім баку.
Як дабрацца? На сваім аўто – па трасе Н8931 Менск – Старое Сяло, на аўтобусе – да прыпынку «Гарадзішча-1». Далей кіруйся ўказальнікам на славутасць. Побач можна паглядзець сядзібу-музей «Стары Менск» з экспанатамі X–XI стагоддзяў і Музей народнай архітэктуры і побыту пад адкрытым небам Строчыцы .
Фота: palasatka
